COMO SE FAI O QUEIXO?

Mañá sairemos de dúbidas na Casa do Queixo, pero antes quixemos investigar un pouco na biblioteca e atopamos un libro: COMO SE HACE. E alí viña moi ben explicadiño todo o proceso de elaboración do queixo. Farano así na Casa do Queixo? Teremos que estar ben atentos para comparar...

CALENDARIO DE XOGOS TRADICIONAIS 2014-2015: TASTARABÁS

Xa rematamos o noso Calendario de Xogos Tradicionais!! 

Cunha chea de xogos que aprendimos grazas ao TASTARABÁS, a Enciclopedia de Brinquedos Tradicionais de Antón Cortizas e cos que xogamos xuntos ao longo de todo este curso.

CUMPLES DE MAIO, MANGO E LIMAS

Hoxe celebramos os cumples do mes de maio. Arón fixo seis e Wences máis Iria fixeron cinco. Entre os tres fixeron unha saborosa e enorme (estreamos molde novo) tarta para convidarnos. Logo viñeron as lambetadas e grazas a Adrián e a súa mamá puidemos probar mango (que veu en avión desde a República Dominicana, como puidemos ver na pegatina). Tamén trouxeron limas, que son moi semellantes aos limóns, pero aínda non as abrimos. Parabéns, mociños! E boa fin de semana!

A CASA DO QUEIXO

A vindeira semana faremos a saída de fin de curso á Casa do Queixo. Na súa páxina web podedes atopar información sobre as actividades, as instalacións, a contorna... Picade na imaxe para visitala.

Lembrade que:

- A saída realizarase o vindeiro mércores 4 de xuño. Saímos de Leiro ás 9:00 (hai que ser moi puntual) e voltamos tamén a Leiro ao redor das 18:30.

- Hai que levar posta crema protectora e zapatillas deportivas pechadas de velcro (NON cordóns, NON sandalias)

- Na mochila levarán unha muda (toda a roupa irá marcada co nome, vale nas etiquetas con bolígrafo): roupa interior, un pantalón longo, unha camiseta, un xersei, un impermeable/cazadora/abrigo (en función do tempo atmosférico), unha gorra.

- O día da saída cada neno entregará á titora a Tarxeta Sanitaria orixinal, que será devolta ese mesmo día cando recollades os nenos.

- Non levarán nada de comer nin de beber.

- Se o neno é alérxico a algo: alimento, animal...deberedes comunicalo con antelación para tomar as medidas oportunas.

- Debido a que a viaxe no autobús ten unha duración bastante longa (1h e media), os nenos que sexan propensos a marearse deberán tomar medidas contra o mareo (preguntade na farmacia ou no pediatra: chicles, pulseiras...)

Se tedes algunha dúbida, consultade á titora.

O RECUNCHO DO CARIBE MEDRA...

Rodrigo amosounos unha maraca que lle trouxo a súa irmá de Cuba. Non sabedes que bonita!! E que ben toca!! E Lucía trouxo un anaquiño do Caribe que fixo na casa coa axuda da súa nai e do seu pai. Con Félix e un amiguiño seu, un oso que se chama Sakura (será xaponés?) Lucía explicounos todo o que necesitaran: unha caixa, pinturas, papeis de cores, unha planta para facer a palmeira... e ir á praia coller cunchas e area! Xa que non podemos ir nós ao Caribe... o Caribe vén a nós! Moitas grazas polo voso traballo e a vosa colaboración... quedamos abraiados!!

COCOS

Adrián e Uxía trouxeron estes días dous cocos para o recuncho do Caribe e hoxe despois da merenda abrímolos e puidemos probalos. Vimos que para poder partir a casca necesitamos un martelo porque é de madeira e moi dura! Despois hai que separar a casca da carne (que é branca!) e se o facemos con coidadiño, botamos a auga de coco nun vaso e podemos bebela. Tamén a cheiramos e algún dixo que cheiraba a iogur, outros a arroz con leite, outros a leite... Houbo quen non quixo nin probar, outros probamos e gustounos, a outros non lles gustou nada...

O mellor foi cando escribimos as letras de Caribe nos anacos de casca do coco e as colgamos no mural. Que chulada!!

PREPARANDO FIN DE CURSO

Achégase o final de curso e temos moito que preparar. Hoxe tocoulles ás portadas dos traballos, que desta volta van pintadas con acuarelas. E tamén traballamos as series grazas aos colares que cada un ten que facer para o baile de fin de curso: palliña, flor, palliña, flor... Ollo, que non valen dúas palliñas seguidas ou catro flores xuntas!! Ao final saíron pero houbo que concentrarse moito para facelo ben...