CONSTRUÍNDO A PAZ II

 Cando chegamos á biblioteca o martes atopamos os nosos bloques dentro dunha bolsa e unha carta de Zapatocas para nós:

Despois de lela, puxémonos mans á obra. Primeiro pensar un título para o mural. Saíron varias opcións: Bloques (varios concordaban), La ballena se fue al agua, Construíndo unha torre alta, Unha torre, A torre de Lidia Cao, A torre, Dúas nenas.

Despois abrimos o enlace que aparecía na carta e soubemos que o mural titúlase CONSTRUÍR, que está en San Agustín del Guadalix e que "foi froito dun encontro entre a asociación local de mulleres Adela Ginés e Lidia Cao. O título recolle a palabra chave á que chegaron artista e participantes tras compartir toda a información sobre a orixe, as actividades realizadas e os obxectivos acadados pola Asociación: construír a partires da loita propia e colectiva e do apoio mutuo entre as compañeiras.

O concepto de construción recóllese na axuda mutua que se prestan ambas mulleres para construír e manter en pé unha estrutura de pedras que representan a Asociación e os seus alicerces ao longo dos seus anos de existencia. Acadar o equilibrio desas pedras supón moito esforzo e dedicación para que a estrutura se conserve e siga medrando. Por todo isto, esas pedras representan tamén as trabas e dificultades que as mulleres veñen afrontando ao longo da nosa historia e como grazas ao apoio mutuo, como acontece na Asociación, lograron conseguir o seu propio espazo de reunión e convivencia."

Por último, limos o libro da paz de Todd Parr e escollemos de que maneira queremos cadaquén aportar o noso gran de area para construír a paz: respectando os demais, querendo as amizades, coidando das nosas irmáns pequenas, coidando o planeta e os nosos mares...Escribímolo xunto os nosos nomes nos bloques e dispuxémonos a construír.

Non foi doado atopar o equilibrio das pezas. Falamos de que coa paz ocurre o mesmo. Hai moitas situacións que poden rompela e derrubala: pelexas, guerras, enfados... Por iso temos que poñer todo o noso empeño en construila e coidala cada día.