OS XIGANTES DA RÍA

No Faro de Vigo viña unha noticia que falaba dun rodaballo de doce quilos. Nas fotos víase enorme. Mercárono para cociñar nun restaurante e aínda sacaron unhas cantas racións. Pero os xigantes da ría tamén son polbos de 7 quilos, un bogavante de 6, unha raia de 29 e un congro de 31 quilos. Quedamos abraiados!

O TREN VAI PASAR POLO MEDIO DE VILAGARCÍA

Na prensa vimos unha noticia que nos chamou a atención: o tren vai pasar mañá venres 14 de xuño polo medio de Vilagarcía. Teñen que cortar o tráfico e extremar as medidas de seguridade. Moitos de nós fixámonos nas vías que pasan preto do cine e da zona de ocio e parécenos incrible que vaia pasar o tren por aí. Se queredes velo en directo, pola tarde ten prevista a volta ás 20 horas.

O ABECEDARIO DOS ANIMAIS

ALBA REMATOU O ÁLBUM DOS ARROASES

Moitos bocatas de peixe despois, Alba acabou o seu álbum e hoxe recibiu un agasallo dos Arroases. Bravo, Alba, xa es toda unha Capitá Arroaz!

O PREMIO DOS ELECTRECOS

Lembrades cando viñeron a visitarnos Os Electrecos ao cole? Pois ao pouco tempo participamos no Concurso de debuxo dos Electrecos e...sorpresa! Tocounos un dos premios! Unha biblioteca básica dos Bolechas para a nosa clase! Estamos moi contentos e desexando recibir os libros.

Xa chegaron os contos do premio dos Bolechas! Moitas grazas!

IMOS AO PARQUE ARQUEOLÓXICO DA ARTE RUPESTRE EN CAMPO LAMEIRO

SAÍDA DE FIN DE CURSO

O vindeiro luns 10 de xuño faremos a saída de fin de curso ao Parque Arqueolóxico da Arte Rupestre en Campo Lameiro. Alí realizaremos unha visita guiada á área arqueolóxica e participaremos en varios obradoiros.

Haberá que levar os nenos e nenas ao Local Social de Leiro ás 9:00 e recollelos no mesmo lugar ás 14:00.

- Prégase puntualidade.

- Lembrade deixar a área de aparcamento libre para que poidan entrar e saír os autobuses.

- Levarase de merenda unha botella de auga e un bocadillo nunha bolsa. Poñede, por favor, o nome na botella de auga e por fóra da bolsa.

- Se algún neno ou nena se marea, preguntade na farmacia que poden tomar para evitalo.

- É imprescincible ter a autorización entregada para vir á saída.