ÚLTIMOS COMEFROITAS DO MES DE MAIO

 

XOANIÑAS, ABELLAS, FLORES...

 Manu e Valeria estiveron pintando pedras coas súas nais e transformándoas en fermosas xoaniñas, abellas e flores. Hoxe repartíronas entre os compañeiros e compañeiras da aula para levar para á casa. Moitas grazas, familias! 

UNHA EIRUGA MOI LARPEIRA

 Hoxe contamos o conto da pequena eiruga larpeira e despois miramos que tal ían as eirugas dos nenos e nenas da clase de Leiro. Sabedes que xa están na fase do casulo? Queda pouquiño para que se transformen en bolboretas!

BOLBORETAS

 

A proposta para o obradoiro de cociña en familia desta fin de semana era facer unha bolboreta de froitas. A primeira chegou voando desde a casa de Lara. Quedou ben saborosa e colorida. Moitas grazas a todas por participar!

Lara e a súa bolboreta de froitas

Adán e a súa bolboreta

O LIBRO DE PEIXES DE MANU

 Lembrades que a final do curso pasado levamos un caderno para pintar con pinceis e pinturas no verán? Pois hoxe Manu tróuxoo cheo de peixes e criaturas mariñas que pintou co seu pai ao longo de todo un ano: un cabaliño de mar, unha troita, un rape, un polbo, unha candorca, chocos, un peixe pallaso, un peixe globo...En cada páxina un diferente con cadanseu nome. Manu foinos amosando e dicindo o nome de cada un. Unha verdadeira obra de arte feita en familia. Moitas grazas por compartilo con nós. Gustounos moitísimo!

DOUS COMEFROITAS MÁIS EN MAIO

 

ERREKA MARI Y EL PEINE DE ORO

 

O martes descubrimos un novo mural de Lidia Cao: Erreka Mari y el peine de oro, ubicado xunto ao río Urumea. A Mari é unha deusa da mitoloxía vasca, personificación da nai terra e raíña da natureza. Xeralmente preséntase con corpo e faciana de muller con abundante cabeleira loura, que peitea ao sol cun peite de ouro.

 Para nós é unha serea que cada vez que pasa o peite de ouro polos seus cabelos, aparece un peixiño.

Buscamos un vídeo para aprender a debuxar unha serea e saíron unha decena delas:

ç

Como non podía ser doutra maneira, o conto que viña co mural era: Sirenas. Encantounos!

FESTA DOS MAIOS 2024

 Despois de ter que adiala por mor do mal tempo, hoxe por fin celebramos a festa dos Maios. Vestímolo de flores, cantamos, bailamos e xogamos acompañados polos gaiteiros e as nosas familias. Moitas grazas a todas por participar!

RESPECTO!

 

Hoxe ao chegar a Leiro descubrimos que alguén decidiu que era boa idea rachar o plástico do invernadoiro e roubar as regadeiras grandes. Non entendemos como hai xente que non respecta o traballo das nenas e nenos do noso CRA e da profe Ana que con tanto agarimo coidan a horta escolar cada día. E non é a primeira vez...

CONCURSO DÍA DAS LETRAS GALEGAS ANPA DO CRA DE RIBADUMIA

 Un ano máis, participamos no Concurso do Día das Letras Galegas organizado pola ANPA do CRA de Ribadumia. Falamos de Luísa Villalta e da paisaxe coruñesa que aparece nas súas obras. A cidade onde naceu, os barrios, o seu "violino", a Peixaría, a Torre de Hércules, o mar... e puxémonos mans á obra.

Moitas grazas á ANPA do noso CRA por fomentar e coidar a nosa lingua guapa!

XOGAMOS CON LUÍSA VILLALTA

 

Onte botámoslle un ollo ao material creado polo Seminario Galán co gallo do Día das Letras Galegas. Primeiro descubrimos o nome de Luísa Villalta agachado detrás dun código secreto e despois completamos o xogo de memoria. Gustounos moito! Se queredes xogar na casa, picade na imaxe para abrilo.

LINGUA GUAPA

 

A nosa pirata vai na procura das palabras máis fermosas do galego. Nas nubes foron aparecendo as palabras que trouxemos da casa. Algunhas repetidas, outras únicas. A nosa lingua guapa está chea de palabras fermosas.